- చెరువు వద్ద గంటల తరబడి ఎదురుచూపులు.. చేపలు లేక ఖాళీ చేతులతో వెళ్లిన జనం
- మృగశిర కార్తి వేళ చేపల కొరత.. ప్రజల్లో అసంతృప్తి
- ఆకునూరు చెరువు వద్ద చేపల కోసం జనం పోటెత్తినా ఫలితం శూన్యం
సైదాపూర్/ధనాధన్ న్యూస్ జూన్ 8: సైదాపూర్ మండలంలోని ఆకునూరు గ్రామంలో మృగశిర కార్తి సందర్భంగా సోమవారం గ్రామ చెరువులో చేపల వేట నిర్వహించారు. చేపలు లభిస్తాయనే ఆశతో ఆకునూరు గ్రామంతో పాటు పరిసర ప్రాంతాల నుంచి భారీ సంఖ్యలో ప్రజలు చెరువు వద్దకు తరలివచ్చారు. అయితే ఆశించిన మేర చేపలు దొరకకపోవడంతో దాదాపు 500 మందికి పైగా ప్రజలు నిరాశతో, ఆగ్రహంతో వెనుదిరిగారు.ప్రజలు మాట్లాడుతూ ఉదయం నుంచే చెరువు వద్ద వేచి ఉన్నప్పటికీ సాయంత్రం నాలుగు గంటల వరకు చేపలు అందుబాటులోకి రాలేదని ఆవేదన వ్యక్తం చేశారు. మృగశిర కార్తి సందర్భంగా చేపలు తినడం ఆనవాయితీగా భావించే అనేక మంది చుట్టుపక్కల గ్రామాల నుంచి వచ్చారని తెలిపారు.
మృగశిర కార్తి రోజున చేపలు తినడం ఆరోగ్యానికి మేలు చేస్తుందనే నమ్మకం ప్రజల్లో ఉంది. చేపల్లో నాణ్యమైన ప్రోటీన్లు, విటమిన్-డి, ఐరన్ వంటి పోషకాలు సమృద్ధిగా ఉండటంతో పాటు వర్షాకాలం ప్రారంభ సమయంలో శరీరానికి అవసరమైన శక్తిని అందిస్తాయని పెద్దలు చెబుతుంటారు.శాస్త్రోక్తంగా సూర్యుడు రోహిణి నక్షత్రం నుంచి మృగశిర నక్షత్రంలోకి ప్రవేశించే కాలాన్ని మృగశిర కార్తిగా పరిగణిస్తారు. మృగశిర నక్షత్రానికి అధిపతి కుజుడు (అంగారకుడు) కావడంతో ఈ సమయంలో వాతావరణంలో మార్పులు చోటుచేసుకుని రుతుపవనాల ప్రభావం ప్రారంభమవుతుందని విశ్వసిస్తారు.
మృగశిర కార్తి రైతులకు ఎంతో ప్రాధాన్యమైన కాలంగా భావిస్తారు. వర్షాలు కురుస్తాయనే ఆశతో రైతులు పొలాలను సిద్ధం చేసుకోవడం, దుక్కి దున్నడం, విత్తనాలు చల్లడం వంటి వ్యవసాయ పనులను ఈ కాలంలోనే ప్రారంభిస్తారు. అందువల్ల మృగశిర కార్తిని ‘ఏరువాక కాలం’గా కూడా పిలుస్తారు. కొత్త పంట సీజన్కు ఇది శ్రీకారంగా భావించబడుతుంది.